Suenter ch’il CB Trun Rabius ha spiars d’Anceinza il final dil cup Grischun, ei il giug da campiunadi encunter igl FC Landquart staus sil program.
Il giug entscheiva fetg uliv, Trun vegn entras in culp liber da Livio Janka e duas mesas caschuns da Robin Monn tier las empremas pusseivladads da marcar; Landquart ha ina fetg buna schanza che Livio Lozza sa parar. Ella 18avla minuta va Landquart en avantatg, quei suenter in culp cul maun exequiu spert. Cuort avon pausa vegn il caucasa aunc tier ina buna caschun entras Patrizio Decurtins; il goli da Lanquart sa denton sclarir fetg ferm sin lingia. Aschia che las equipas van cun il resultat da 0:1 per Landquart ella pausa.
La secunda mesadad entscheiva cun ina duscha freida per Trun/Rabius. Suenter in corner tucca il bal il maun da Mathias Flepp, il penalti nezegia Landquart e va cun 0:2 en avantatg. Ella 57avla minuta vegn ei aunc meglier pils hosps. Suenter ina corna vegn Trun buc da spedir il bal e Landquart marca il 0:3. Silsuenter vegn Trun/Rabius tier entginas bunas caschuns da scursanir, denton parescha il ferm goli Leon Minni tut ils siets ni che Trun ha il discletg da tuccar duas gadas mo igl alumini. Suenter in culp liber ella 75avla minuta sa Landquart alzar il resultat sin 0:4. Ella 80avla minuta sa Trun/Rabius aunc scursanir entras in penalti da Livio Janka sin 1:4, denton buc ina minuta pli tard aulza Landquart entras in sbagl individual sin il resultat final dad 1:5 en favur dils hosps da Landquart.
Per Trun/Rabius fuss segir dapli stau pusseivel encunter quei adversari, denton eis ei vegniu fatg memia biars sbagls individuals. Trun/Rabius sto mussar venderdis proxim encunter FC Triesen ina reacziun e finalmein puspei recaltgar puncts per aschia tener sin distanza ils concurrents encunter il cumbat da relegaziun.
informaziuns: 3. ligia, gruppa 1; CB Trun/Rabius – FC Landquart 1:5 (0:1)
gols: 18’ Landquart, 50’ Landquart, 57’ Landquart, 75’ Landquart, 80’ Livio Janka, 81’ Landquart
CB Trun Rabius: Livio Lozza, Rovin Schmed, Lucas Maissen, Livio Janka, Mirco Pfister, Geo Cauzza, Denis Monn, Mathias Flepp (C), Robin Monn, Gianin Derungs, Patrizio Decurtins – reservas: Nico Caduff, Damian Schmed, Orlando Monn, Silvan Muoth, Andri Carigiet, Tizian Duff, Toni Cathomas
FC Landquart: Leon Minni, Men Hermle, Gian Huber, Flurin Brändli, Nando Oertli, Manuel Candrian, Joao Paulo Sousa Madureir, Renato Oswald (C), Marc Pirovino, Pedro Jorge Teixeira Costa, Jetmir Hashani, Noé Niggli, Sandro Hertner, Yaron Bless, Mirco Fausch, Mate Lekishvili
remarcas: CB Trun/Rabius senza Sandro Orlik, Ramon Orlik, Beat Cadruvi, Remo Alig, (tuts blessai) Aurelio Carigiet, Mattia Friberg, Lucas Seiler, Clau Berther (absents)