Sogn Pieder ha buca manegiau bein cun ils giugadurs dalla 2. equipa da Domat e dil CB Trun/Rabius Grp. ed ha schau plover tut tgei che mava giu da tschiel avon il giug, denton sco ch’igl arbiter ha dau liber il giug ei l’aura secalmada e la partida ha saviu entscheiver. Il CB ha buca schau stermentar da quei ed ei partius plein anim egl emprem giug dalla sesiun. L’equipa da Trun/Rabius ha mussau ina fetg engaschada prestaziun e gudignau la partida claramein.
L‘equipa dalla Cadi ei stada fetg presenta naven dall’emprema minuta ed ha mussau ad il cau-casa da Domat ch‘els veglien la victoria e contonscher il final dalla cuppa Grischuna che ha liug ella capitala dil Grischun a Cuera ils 9-5-2024.
Il giug entscheiva cun ina attacca da Domat che Lucas Maissen sa sclarir cuort avon la zona da puniziun, cuort suenter vegn Mirco Pfister tier in siet da distanza ch‘il goli da Domat sa parar. Trun/Rabius surpren naven da quei mument la bitgetta dil giug ed entscheiva a smaccar en igl adversari. Robin Monn vegn da mitschar dalla defensiun e sa mo vegnir frenaus cun in foul. Daco ch‘igl arbiter ha buca mussau ina carta ei buca propi capeivel, la colur giustificada fuss stada stgir oranscha. Il CB lai buca suenter e fa vinavon pressiun sin il gol da Domat. Gia la 11avla minuta vegnan ils hosps tier in culp liber ord biebein 30 meters. Livio Janka sietta il tal sin via directa encunter il gol da Domat, mo Dario Brot sa sviar quel tier ina corna. Robin Monn porta quella sin la secunda petga nua che Patrizio Decurtins marca ella 12avla minuta il 0:1 cul tgau per l’equipa da Trun. Il CB Trun/Rabius lai buca suenter e vul dispet il 0:2. Suenter entginas minutas cun dirs cumbats el miez dil plaz vegn il CB Trun/Rabius tier duas bunas caschuns ch‘el sa buca nezegiar. Ella 35avla minuta vegn il CB allura tuttina tier il 0:2, quei suenter ina biala cumbinaziun dalla vart seniastra giu, Remo Alig vegn da metter atras il bal sin Geo Cauzza che sietta ord 18 meters il bal ault el cantun seniester dil gol. Il CB ei aunc buc cuntents cun il resultat ed astga beinspert puspei giubilar; ella 43avla minuta vegn Patrizio Decurtins da marcar il 0:3, quei puspei suenter ina corna da Robin Monn. Cun quei resultat va ei ella pausa.
Per Trun/Rabius eis ei clar da far vinavon suenter pausa nua ch‘el ha calau. Il giug vegn pli intensivs ed ils cumbats han pil pli liug amiez il plaz. Suenter 63 minutas decida Patrizio Decurtins la partida cun il 0:4, quei suenter ch‘el vegn l’antschaus ella profunditad e sa semetter atras encunter la defensiun da Domat; el meina ora a moda suverana il goli e marca cun saung freid siu tierz gol dil di. Trun/Rabius lai buca luc e fa vinavon pressiun sin il gol da Domat. Suenter 76 minutas siara Geo Cauzza dil tuttafatg il sac; el sietta ord rodund 25 meters egl adversari che sviescha il siet ella reit. Sil pli tard uss sa negin pli prender la victoria meritada als hosps dalla Cadi. Las davosas minutas dil giug sa il goli da CB Trun/Rabius Daniel Monn aunc semussar e salvar la vesta alva cun ina ferma parada.
Aschia gudogna il CB Trun/Rabius ordeifer la partida dil 1/2 final dalla cuppa Grischuna claramein cun 0:5, quei suenter ina fetg solida ed engaschada prestaziun. Suenter la victoria el cup Grischun igl onn 1979 selegra il CB Trun/Rabius da puspei astgar giugar da Tschuncheismas il final dalla cuppa Grischuna a Cuera e spera sin ferm sustegn da ses fideivels aspectaturs.
Per Trun/Rabius va ei vinavon dumengia ils 5-4-2024 cun il derbi sursilvan encunter l‘equipa da Schluein/Glion. Suenter la prestaziun mussada a Domat sin il plaz da ballapei Vial sto il CB buca sezzupar e sa selegrar sin in intressant giug a Pustget.
informaziuns: ½ final Cup Grischun; FC Domat 2 – CB Trun/Rabius Grp. 0:5; (0:3)
gols: 12 Patrizio Decurtins, 35 Geo Cauzza, 43 Patrizio Decurtins, 63 Patrizio Decurtins, 76 Geo Cauzza
FC Domat 2: Dario Brot, Tobias Walter, Gian-Luca Fahling, Matthias Pfister, Samy Almagbaly, Cedric Sewer, Fabian Zimmermann, Alessio Iozzo, Fabrizio De Luca (C), Damian Sewer, Danilo Iozzo – reservas: Marc Henriques Da Silva, Mauro Stolz, Esa Ehrler, Alessio Sewer, Sandro Dietrich, Bardh Bojaxhi, Martinijan Markovski
CB Trun Rabius Grp.: Daniel Monn, Geo Cauzza, Lucas Maissen, Livio Janka, Mirco Pfister, Rovin Schmed, Mathias Flepp (C), Robin Monn, Orlando Monn, Remo Alig, Patrizio Decurtins – reservas: Damian Schmed, Beat Cadruvi, Denis Monn, Clau Berther, Andri Carigiet, Silvan Cajacob, Aurelio Carigiet
remarcas: CB Trun/Rabius senza Sandro Orlik, Ramon Orlik, Silvan Muoth, Tizian Duff, Gianin Derungs (tuts blessai) Lucas Seiler (absents)