Pausa d’unviern sur il streh

A caschun dil davos giug a casa dalla sesiun d’atun astga il CB Trun/Rabius beneventar danovamein ina gronda raspada da ses fideivels fans a Pustget. La tensiun ei gronda, cun ina victoria savess il CBTR sedistaccar empau dil streh ferton ch’ils hosps dalla principala dil cantun Grischun ein vegni a Pustget cugl intent da setener ella emprema mesadad dalla tabella.

La partida entscheiva lu era bufatg. Il terren bletsch fa buc sempel allas equipas, savens vesan ils aspectaturs giugadurs che seleischnan. Igl ei in classic sondar in l’auter e gie buc far sbagls. L’equipa da Cuera ha dapli il bal, denton eisi l’equipa da casa che vegn adina puspei da rumper atras e vegnir tier occasiuns. Propi ina gronda schanza seresulta denton buc. Suenter pausa vegnan ils da Cuera meglier el giug, tuttina vesan ils aspectaturs vinavon buc acziuns malsegiras avon ils dus gols, pia ch’ei va gia direcziun 0:0. Mo na, ei vegn auter. Ella 70. minuta nezegia Rodrigues ina deliberaziun da Trun/Rabius buc gartegiada e sieta ord 20 meters ina vera rachetta ella reit da Trun/Rabius. 0:1 per Cuera. L’equipa da casa ei capeivlamein buc cuntenta cun quei ed emprova uss da metter si dapli squetsch. Deplorabel meina in ulteriur sbagl individual 4 minutas avon la fin tier il 0:2 per Cuera. Mo era uss betta il CBTR buc la faultsch el canvau e vegn ella 89. minuta entras Robin Monn ed in bellezia gol da scursanir. Dapli schai denton buc en quei di a Pustget, aschia che Cuera engola ils 3 puncts ord la Cadi. 

Trun/Rabius astga tuttina ir ella pausa d’unviern cun in plaz sur il streh, quei che secapescha aunc adina buc da sesez cumparegliau cun las pusseivladads che autras equipas da quella gruppa han. Quei che semuossa uonn ei che la 3. ligia – priu ora Schaan ch’astga gia planisar cun la promoziun – ei fetg uliva. Las equipas davontier paran dad esser in tec pli fleivlas ch’ils davos onns – e quellas davostier pli fermas. Tut en tut vess Trun/Rabius segir saviu ir per dapli puncts sch’ins patratga gest vid ils giugs encunter Mels, Flums e Sargans. Denton ston ins far in cumpliment alla equipa giuvna trenada da Claudio Bundi e Sandro Orlik sco ei emprovan fin d’jamna per fin d’jamna da prender ora il maxium. Ei dat in dir e stretg cumbat primavera per tener la 3. ligia, denton ha Trun/Rabius las habilitads da tener tala.