Zum Inhalt

In punct meritau

Suenter duas vicorias en seria frunta il CB Trun/Rabius ella 2. davosa runda dil campiunada da 3. ligia sin igl FC Triesenberg. Cunquei ch’il CB Trun/Rabius ha giu buca meins che 8 absenzas (6 blessai e 2 absents) ei il trenader Claudio Bundi staus sfurzaus da far entginas midadas.

Il giug entscheiva meglier pil caucasa. Suenter ina corna vegn Mauro Alig da parar igl emprem siet e Mirco Pfister sa sclarir il bal avon ch’el va sur la lingia vi. Silsuenter vegn il CB empau meglier el giug ed era gest tier l’emprema occasiun da gol; Mathias Flepp tarmetta cun in bi pass igl attaccader ella profunditad che sa silsuenter ir persuls encunter gol, denton vegn il goli da Triesenberg da parar quei siet. La 12avla minuta eis ei aschi lunsch ed il CB Trun/Rabius astga giubilar per l’emprema gada. Mathias Flepp tarmetta il bal sur la defensiun da Triesenberg e Gianin Derungs aulza il bal sur il goli ora en la reit. Sco sche quei gol dils hosps dalla Cadi vess destadau il caucasa, aulzan els la cadenza e vegnan ella 18avla minuta da marcar igl 1:1 entras Reto Tscherfinger, quei suenter in culp liber ord il miez dil plaz ed ina durmida collectiva dil CB Trun/Rabius. Suenter quei gol ei il caucasa definitiv meglier el giug e vegn ella 30avla minuta entras Ricardo Maia de Sousa tier il 2:1, era quei suenter ch’il CB Trun/Rabius ha defendiu memia passiv e schau memia bia libertads als attaccaders da Triesenberg. Suenter quei gol para ei sco sche Trun/Rabius havess puspei anflau anavos el giug e vegn entras in siet da Robin Monn fetg datier dil 2:2, denton vegn quei siet paraus dil goli Nikola Pupovac. Cuort suenter vegn Trun/Rabius denton tuttina d’egualisar la partida. La 36avla minuta porta Robin Monn ina corna en la zona da puniziun nua che Mathias Flepp spetga e spedescha il bal cul tgau en la reit. Cuort suenter vegn Triesenberg denton puspei dad ir en avantatg; la 38avla minuta setta Reto Tscherfinger ord biebein 30 meters il bal en la reit. Aschia che las equipas van cun il resultat da 3:2 en la pausa.

Suenter ina midada dil sistem da giug entscheiva CB Trun/Rabius meglier la 2. mesadad e vegn en la 52avla minuta tier in penalti, quei suenter che Toni Cathomas ei vegnius mess per tiara en la zona da puniziun. Il capitani Mathias Flepp surpren la responsabladad e marca cun saung freid il 3:3 naven dil punct. Silsuenter ei il giug per gronda part ulivs, denton las meglieras caschuns da marcar ha il caucasa. En la 70avla minuta cuora igl attaccader da Triesenberg persuls encunter il gol da Trun/Rabius, siu siet sa Mauro Alig denton sviar en la petga. Silsuenter defenda Trun/Rabius pli consequent e vegn per gronda part da tener naven ils adveraris dil gol. Cuort avon la fin vegn igl attaccader dil CB Trun/Rabius bunamein aunc da procurar per la victoria. Suenter che Robin Monn retscheiva in pass ella profunditad, vegn el da semetter atras e cuorer persuls encunter il gol, deplorablamein vegn el buc da marcar e metta il bal sper la petga ora. Cuort suenter quella acziun schula igl arbiter giu la partida a Leitawies cun il resultat final da 3:3.

Suenter quella partida denter duas equipas ulivas ei in pari il gest resultat. Sut las circumstanzias che Trun/Rabius ha stuiu giugar senza otg giugadurs, sa l’equipa dalla Cadi esser cuntenta cun quei resultat. Per il CBTR vala ei ussa aunc inagada da sefocussar sin il davos giug da campiunadi che ha liug proxima dumengia a Trun Pustget encunter l’equipa da Cuera 97.

informaziuns: 3. ligia, gruppa 1; FC Triesenberg 1 – CB Trun/Rabius 3:3 (3:2)

gols: 12 Gianin Derungs, 18 Reto Tscherfinger, 30 Ricardo Maia de Sousa, 36 Mathias Flepp, 38 Reto Tscherfinger, 52 Mathias Flepp

FC Triesenberg 1: Nikola Pupovac, Pascal Koller, Diego Mazzini, Luka Krbanjevic, Fabian Ducak, Hamza Sljivar, Marius Beck, Reto Tscherfinger, Nils Sprenger, Sebastian Beck, Ricardo Maia de Sousa, David Julian Pupovac, Tobias Eberle, Lucas Viegas Soares Soares, Timur Morais Dogan, Pius Sprenger, Robin Gassner, Luca Meier

CB Trun Rabius 1 Grp.: Mauro Alig, Orlando Monn, Lucas Seiler, Cedric Spescha, Mirco Pfister, Remo Alig, Mathias Flepp, Beat Cadruvi, Andri Carigiet, Robin Monn, Gianin Derungs, Damian Schmed, Lucas Maissen, Tizian Duff, Toni Cathomas, Clau Berther, Elia Schmed, Silvan Cajacob

remarcas: CB Trun/Rabius senza Sandro Orlik, Ramon Orlik, Silvan Muoth, Denis Monn, Patrizio Decurtins, Geo Cauzza (tuts blessai), Rovin Schmed e Livio Janka (absents)