Zum Inhalt

Victoria a Pustget

La dumengia vargada ha l’emprema equipa da Trun/Rabius retschiert igl FC Triesen ord il Principadi da Liechtenstein. Omisduas squadras sesanflan alla fin dalla tabella. Aschia ch’ei era per las equipas ina fetg impurtonta partida per saver far bien puncts sin ils plazs da relegaziun.

La partida entscheiva fetg uliva e cun bia malexactadas el davos tierz dil plaz. Tier schanzas malsegiras vegnan las equipas denton buca. Ella 10. minuta vegn igl attaccader da Triesen da mitschar e sa mo pli vegnir frenaus dil goli Mauro Alig cun in foul ella zona da puniziun. Igl arbiter schula claramein penalti. Mauro Alig vegn denton da parar il siet cun bravura e manetgn il resultat da 0:0. Sil pli tard uss ei il CB Trun/Rabius neunavon ed entscheiva a crear schanzas. Ella 15. minuta emprova Patrizio Decurtins cun in siet da distanza, il qual tucca denton mo igl alumini. Silsuenter vegn il giug puspei pli ulivs e tier pli grondas pusseivladads vegnan las equipas buc. Igl ei da sentir che las duas squadras vulan en emprema lingia buca schar tier in gol. Cuort avon la pausa vegn l’equipa da casa cun ina buna acziun dad ir en avantatg. Mirco Pfister arva cun in fetg bi pass sin l’ala il giug ed anfla leu Orlando Monn, il qual tarmetta en la gassa Patrizio Decurtins che meina ora il goli da Triesen e stauscha en per igl 1:0 pil CB Trun/Rabius. Mo avon ch’igl arbiter tarmetta las equipas ella pausa vegnan ils adversaris aunc tier ina fetg buna schanza. Igl attaccader da Triesen vegn da menar ora il goli ed ei persuls avon il gol. Siu siet vegn denton paraus sin lingia dil giuven defensur Geo Cauzza. Cun quella acziun va ei ella pausa.

Silsuenter vegnan ils adversaris pli ferm ord la cabina ed emprovan per tut prezi d’egualisar il resultat. La defensiun da Trun/Rabius vegn denton da tener pétg. Ella 57. minuta gudogna Gianin Derungs il bal el rudi da miez e semetta atras encunter il davos defensur. Aschia vegn el da stuschar il bal cun saung freid sper il goli en ed aulza il resultat sin 2:0 per il caucasa.  Ins po haver il sentiment ch’il giug ei ussa decidius. Mo ils hosps vegnan ella 65. minuta dad alzar sin 2:1 suenter ina biala cumbinaziun. Il giug ei puspei aviarts. Il CB Trun/Rabius manetegn denton las gnarvas e damogna il resultat sur il temps.  

L’equipa dalla Cadi gudogna aschia siu tierz giug da quella sesiun. Cun il resultat final da 2:1 salvan els ils treis puncts e damognan il segl ord la zona dalla relegaziun. Il proxim giug ein els hosps a Triesenberg che sesanfla el miez dalla tabella.

informaziuns: 3. ligia Gruppa 1; CB Trun/Rabius 1 Grp. – FC Triesen 1

CB Trun/Rabius 1 Grp.: Mauro Alig, Mirco Pfister, Livio Janka, Lucas Seiler, Geo Cauzza, Andri Carigiet, Mathias Flepp, Orlando Monn, Robin Monn, Gianin Derungs, Patrizio Decurtins, Tizian Duff, Beat Cadruvi, Lucas Maissen, Clau Berther, Damian Schmed, Rovin Schmed, Remo Alig

FC Triesen 1: Andreas Kindle, Daniel Salzgeber, Mike Almer, Lucas Neusüss, Nilo Marxer, Julien Hasler, Rafael Grünenfelder, Kevin Ferreira Eido, Raphael Auer, Kenny Kindle, Dany Ferreira Eido, Selcuk Bicer, Fabio Bicker, Fabian Bargetze, Lorian Ajvazi, Valerio Giunior Puopolo, Tritan Fejzaj

remarcas: CB Trun/Rabius senza Sandro Orlik, Ramon Orlik, Silvan Muoth, Denis Monn (tuts blessai)

gols: 42’ Patrizio Decutins (1:0), 57’ Gianin Derungs (2:0), 65’ Raphael Auer (2:1)