Zum Inhalt

Perseveronza porta success

La sonda vargada ha l’equipa da Trun/Rabius retschiert la squadra da Domat. Per omisduas equipas era quei ina impurtonta partida. Per Trun/Rabius fuss ina victoria stada impurtonta per buca restar alla cua dalla tabella. Ina victoria per Domat havess muntau che la squadra fagess in segl encunter anavon ella tabella. Aschia ch’ils aspectaturs/as han saviu selegrar sin ina intensiva ed interessanta partida a Pustget sut las novas cazzolas. 

Punct las 19:00 dat igl arbiter liber la partida avon in bi publicum e fetg bunas premissas da temperatura, sco era dil plaz. Gia naven dall’entschatta ei clar che l’equipa da casa less salvar ils puncts a Pustget; che quei vegni denton buca sempel saveva mintga giugadur avon la partida. L’emprema fasa vegn Trun/Rabius da controllar il giug, denton las schanzas claras per far in gol stattan ora. Ella 22. minuta suonda la duscha freida. Ils hosps survegnan in culp liber ord biebein 35 meters ed il siet anfla la via ella reit dil CBTR. Aschia meina igl FC Domat cun 1:0. Entochen la 36. minuta dat ei sin omisduas varts buca grondas schanzas pli. Allura capeta ei denton: Robin Monn vegn da semetter atras fetg ferm encunter plirs adversaris e tarmetta igl Orlando Monn cun in bi pass. Lez fa in crutsch e sietta el cantun liung. Aschia ei la partida puspei egualisada. Cun il tgau gia vid la pausa vegn Domat aunc cuort avon pausa tier ina schanza. Ella 45. minuta van ils hosps danovamein en avantatg e meinan da pausa cun 2:1.

Suenter il te piarda la partida il tempo ed ils cumbats vegnan pli intensivs. Igl ei denton da sentir che la squadra da casa less quella victoria. Aschia tarmetta Gianin Derungs cun in bal precis ella gassa Patrizio Decurtins. Lez sietta cun saung freid il bal el cantun liung ed aulza il resultat sin 2 :2. Il CB Trun/Rabius sa denton buca selegrar ditg. Mo paucas minutas suenter la equalisaziun aulzan ils hosps sin 3:2 e quei cun in siet da dumengias ord 25 meters. Il CB sto uss per la tiarza ga empruar dad egualisar il resultat. Cun fetg gronda ambiziun gartegia quei era. Ella 85. minuta vegn Gianin Derungs d’alzar danovamein sin 3:3. Mo ei vegn aunc meglier. Il CB emprova cun tut las pusseivladas da far il gol decisiv en quei giug e salvar ils treis puncts.

La partida sesanfla gia ella 93. minuta e l’equipa da casa emprova vinavon cun enorm squetsch e sustegn dils aspectaturs da far il gol. Cun la davosa acziun dalla partida vegn Gianin Derungs da semetter atras e vegn frenaus dil goli dils hosps cun in foul ella zona da puniziun. Igl arbiter schula claramein penalti pil CB Trun/Rabius. Livio Janka tschenta il bal e sieta cun saung freid il 4:3 per Trun. Paucas minutas suenter ei la partida a fin ed aschia gudogna il CB Trun/Rabius.

Per Trun ei quei stau la secunda victoria eifer il campiunadi. Suenter ina partida intensiva vegnan els da salvar ils puncts. Per Trun/Rabius va ei vinavon proxima dumengia a Pustget encunter igl FC Triesen. La equipa dil Principadi da Liechtenstein sesanfla momentan in plaz davon il CB Trun/Rabius. 

informaziuns: 3. ligia, gruppa 1

CB Trun/Rabius 1 Grp.: Mauro Alig, Mirco Pfister, Livio Janka, Lucas Seiler, Geo Cauzza, Andri Carigiet, Rovin Schmed, Mathias Flepp, Orlando Monn, Robin Monn, Gianin Derungs, Patrizio Decurtins, Tizian Duff, Beat Cadruvi, Lucas Maissen, Clau Berther

FC Ems 2: Dario Brot, Tobias Walter, Matthias Pfister, Fabrizio de Luca, David Roberto Bucek, Gian-Luca Fahling, Cedric Sewer, Alessio Sewer, Fabian Zimmermann, Alessio Lozzo, Danilo Lozzo, Mauro Stolz, Arber Bojaxhi, Damian Sewer, Sadro Dietrich, Marc Henriques Da Silva, Nicolo Stolz

remarcas: CB Trun/Rabius senza Sandro Orlik, Ramon Orlik, Silvan Muoth, Denis Monn (tuts blessai), Remo Alig (absents)