La secunda gudogna il derbi tradiziunal encunter la US Danis-Tavanasa grazia a quater gols ell’emprema mesadad.
Il giug entscheiva pli che mal pil CB. Gia suenter treis minutas van ils hosps en avantatg entras in autogol da Fabian Cajacob. Igl attaccader dall’USDT setta naven dil cantun dalla zona da puniziun il bal ferm a bass nua ch’il goli Gian Carlo Candinas spedescha il bal gest vi en siu congiugadur e da leu va il curom ella reit. La secunda equipa sut schoc? Na, la reacziun vegn immediat. Suenter in bi pass ella gassa da Philippe Vincenz ha Salvatore Staglianò neginas breigias d’egualisar ella 9avla minuta. E l’equipa da casa dictescha vinavon la partida. Ella 24avla minuta dat ei da veser a Pustget in’acziun da bellezia. Il defensur Ursin Deflorin cun bi pass sil giugadur d’ala Mattias Candinas e lez culla flanca avon gol nua che Curdin Tuor setta il bal direct ella crusch tiel 2:1. Ed aschia va ei vinavon. Suenter in assist sa Mattias Candinas cuort suenter giubilar davart in gol. Quei cun in bi siet da distanza da rodund 18 meters. E cuort avon pausa gartegia a Michele Decurtins perfin il 4:1 cun in aschinumnau “Abstauber”.
Cun in avantatg comfortabel vai ella secunda mesadad nua che la secunda ha la finamira da cuntinuar cul ballapei offensiv. Ellas empremas minutas eisi lu era vinavon mo il CB che enquera l’offensiva. Pliras schanzas vegnan denton munchentadas. Suenter rodund 60 minutas para ei lu sco sch’enzatgi havess tratg la bescla tier l’equipa da casa. Naven d’in mument sin l’auter funcziuna quasi nuot pli. Memia lescher pren il CB uss quei giug e la US Danis-Tavanasa freda la puorla e vegn entras conters uss adina puspei malsegir avon gol. L’equipa da casa betlegia quasi per in cuntergol e rodund 10 minutas avon la fin gartegia era il 2:4 all’USDT. Era suenter quei cuntergol semegliura il giug buc tier il CB. Ils hosps vegnan aunc tier 1-2 bunas occasiuns. In ulteriur gol dat ei denton buc quei venderdis sera a Trun. Aschia va il derbi a fin avon ina fetg biala culissa da fans cun in 4:2 pil CB Trun/Rabius.
La secund’equipa ha propi mussau duas differentas fatschas en quei derbi. Ell’emprema mesadad han ils aspectaturs viu fetg bia bialas acziuns ed igl ei stau sil plaz in’equipa plein engaschi che ha era mussau grond plascher da giug. Suenter pausa ei denton mo pli pauc da quei stau da veser. Memia luc ha l’equipa priu il giug. Mo per quella ga ei la secunda vegnida naven cun in egl blau.
Vinavon vai per la secunda gia proxim venderdis ordeifer encunter il CB Laax. Il giug sin la plazza da sport Lag sec entscheiva las 20:00.
informaziuns: CB Trun/Rabius – US Danis-Tavanasa 4:2 (4:1)
formaziun: Gian Carlo Candinas, Moreno Bundi, Fabian Cajacob, Ursin Deflorin, Mattias Candinas; Salvatore Staglianò, Daniel Monn, Philippe Vincenz; Michael Decurtins, Curdin Tuor, Serafin Lehmann
reservas: Andri Nay, Severin Küttel, Andri Carigiet, Fabrizio Della Valle, Stefano Stagliano, Simon Decurtins, Bono Deplazes