Zum Inhalt

Clara caussa a Pustget

Quella dumengia ha l’emprema equipa da Trun retschiet igl FC Schaan. Tochen dacheu ei l’equipa dil Principadi dil Liechtenstein aunc stada senza ina solia terrada en quei campiunadi. Aschia era la finamira clara, dumignar da vilentar il capogruppa a casa a Pustget.

Avon biebein 200 aspectaturAs va la partida liber da bellezia aura ed ina temperatura da 20°C. Schegie ch’igl arbiter sto dar liber il giug cun 10 minutas retard entscheiva il giug ton pli intensiv. L’equipa da casa para dad esser sesemtgada fermamein ed entscheiva furiusamein la partida. Cun grond engaschi vegnan els da tener encunter al ferm adversari las empemas 15 minutas. Mo allura capeta ei. Cun igl emprem siet sin gol ed in menaschi ell’atgna zona da puniziun setschenta il bal ella reit. Aschia meina igl FC Schaan gia baul cun 0:1. Sinaquei drova ei dall’equipa da casa ina reacziun. Ella 20. minuta aulza il Mathias cun in schi numnau “chip” il bal sin Gianin ed anfla amiez il Remo tut liber. Il siet ord dus meters vegn denton paraus a moda suverana dil goli da Schaan. Las proximas minutas vegnan Trun sco era Schaan adina puspei tier occasiuns da marcar in ni l’auter gol. Il giug ei vinavon fetg intensivs ed ei vegn cumbattiu enorm sin omisduas varts. Ei para sco sche l’equipa adversaria mass cun in 0:1 en cabina da pausa. Ella 45. minuta aulza igl FC Schaan denton il resultat sin 0:2 suenter in flanca ord 35 meters che setschenta sin via directa en gol. Cun il te da pausa meinan ils adversaris aschia 0:2.

Dat ei ina reacziun suenter pausa? Quella damonda tschentan ils numerus aspectaturs. Igl arbiter dat puspei liber la partida. Suenter cuort temps ei clar, il capogruppa ord il principadi ei ina numera pli ferma. Per Trun ei la devisa ussa clara: Defender e sperar sin ina ni l’autra schanza. Igl FC Schaan lai denton buca tier grondas e muossa ton pli fetg daco ch’els ein il capogruppa. Aschia aulzan els ella 52. minuta sin 0:3 ed ella 61. minuta sin 0:4. Per Trun ei la partida vargada suenter in’ura. Igl FC Schaan lai denton buca suenter ed va ella 68. minuta en avantatg cun 0:5. Cuort avon il schul da finiziun anfla il bal aunc inagada la via ella reit. Aschia ei il resultat final dil 6avel giug da campunadi 0:6.

Pil CB Trun/Rabius ei quei segir stau in dils grevs giugs da campiunadi dalla sesiun 2023/2024. Il capogruppa semetta claramein atras cun in 0:6 e schai aschia vinavon sin igl emprem plaz. Il CB Trun/Rabius cumbatta vinavon per saver far il segl sur ils plazs dalla relegaziun. Per la squadra da Trun va ei vinavon cun il derbi encunter igl USSI proxima sonda a Crap Gries. 

informaziuns: 3. ligia, gruppa 1; CB Trun/Rabius – FC Schaan 0:6, (0:2)

CB Trun/Rabius 1 Grp.: Mauro Alig, Orlando Monn, Lucas Seiler, Livio Janka, Mirco Pfister, Mathias Flepp, Denis Monn, Robin Monn, Remo Alig, Tizian Duff, Gianin Derungs, Lucas Maissen, Patrizio Decurtins, Andri Carigiet, Beat Cadruvi, Rovin Schmed

FC Schaan 1: Igor Migueis Da Graca, Jonas Beck, Marco Oehri, Fabio Quaderer, Helder Placido, Liam Kranz, Matthias Quaderer, Lucas Alves, Fabian Eberle, Matias Antuovic, Lucas Eberle, Jonas Strunk, Daniel Sobkova, Fabian Biedermann, Mohammed Hachem, Justin de Almeida, Leo Loos

remarcas: CB Trun/Rabius senza Sandro Orlik, Ramon Orlik, Silvan Muoth, (tuts blessai), Geo Cauzza (absents)