La dumengia vargada ei il CB Trun/Rabius serendius tier l’equipa songagliesa a Flums. Suenter che l’equipa ha gudignau ses dus davos giugs, spera la squadra trenada da Claudio Bundi era en quei giug da turnar a casa cun treis puncts dapli sin il conto.
Sut fetg bunas premissas e bellezia aura da settember entscheiva la partida avon ina biala raspada d’aspectaturs/as. Gia naven dall’entschatta emprovan ils hosps da surprender la bitgetta e dar en il tact. E quei gartegia era. Ella 8. minuta lantscha il defensur Livio in bal sin Remo, lez stauscha vinavon el sin Robin ed anfla il attaccader Gianin. Siu siet tucca denton mo igl alumini. Sil pli tard uss ei clar ch’il CB less quels treis puncts. Cun grond engaschi e ferms cumbats vegnan ils Sursilvans adina puspei tier bunas schanzas. Aschia era ella 15. minuta. Suenter in culp liber exequius spert tucca igl attaccader danovamein mo igl alumini. L’equipa da casa ei surdumandada en quella fasa cun il tempo ed igl engaschi dils hosps. Egl emprem tierz dalla partida stuess il CB gia menar cun 2:0.
Uss entscheiva igl FC Flums denton a tener pétg e vegnan meglier el giug. Aschia ch’ei sedat enquala buna schanza. Mo ils hosps emprovan vinavon per tut prezi e van allura meritadamein en avantatg. Il bal vegn gudignaus ella zona da miez e setschenta tier Denis, lez meina ora in giugadur e sietta ord 20 meters el cantun liung. Il goli da Flums sdrema aunc cun la detta il bal, mo quei gida nuot pli. Aschia stat ei 1:0 per Trun.
Uss vess il nuv dad esser sesaviarts, mo ei vegn tut auter. Il giug ei uss pli ulivs ed il tempo lai suenter. Cuort avon pausa vegn ei aunc inagada interessant. Ella 44. minuta aulza il Robin cun sentiment in bal sur il goli da Flums – ed igl ei strusch da crer, mo era quel tucca puspei igl alumini. Ei quei insumma pusseivel? Aschia schula igl arbiter giu l’emprema mesadad e las equipas van ellas cabinas. Suenter las empremas 45 minutas stuess il CB Trun/Rabius gia menar silmens cun 3:0, mo igl alumini lai buca tier quei. Anavos sin il plaz para ei sco sche la squadra da Trun fuss vegnida midada ora. Als hosps gartegia nuot pli ed ei vegn tier dapli malexactadas, sbagls e fleivlezias els cumbats. Quei nezegian ils Songaglies naturalmein ed egualiseschan aschia ella 51. minuta cun in siet ord distanza. Pil CB Trun/Rabius ei quei il mender che ha saviu schabegiar en quella fasa. Ussa ei ina malsegirtad da sentir che va en favur all’equipa da casa. Aschia vegn ei ch’igl FC Flums aulza suenter ina sperdita dil bal sin 2:1 ella 60. minuta. Sil pli tard uss stuess il CB mussar ina reacziun e puspei esser pli presents. Mo quella stat ora. Il giug va en la fasa finala ed il CB vegn buca da midar pli enzatgei vid il resultat. Ella 94. minuta decida allura igl attaccader da Flums definitiv il giug ed aschia ei il resultat final 3:1.
Il CB Trun/Rabius spiarda ina impurtonta partida e schai aschia ella tabella sut il streh da relegaziun. Ins sa dir che la squadra ha dumignau sesezza cun buca nezegiar las schanzas cun saung freid e vitier haver il discletg da tuccar treis gadas igl alumini. Proxima dumengia spetga sin la squdra da Trun ina fetg greva partida encunter igl FC Schaan che ha tochen dacheu gudignau mintga partida en quei campiunadi e sesanfla sin igl emprem plaz ella tabella.
informaziuns: 3. ligia, gruppa 1; FC Flums – CB Trun/Rabius 3:1 (0:1)
CB Trun/Rabius 1 Grp.: Mauro Alig, Orlando Monn, Lucas Seiler, Livio Janka, Mirco Pfister, Mathias Flepp, Denis Monn, Robin Monn, Remo Alig, Andri Carigiet, Gianin Derungs, Lucas Maissen, Tizian Duff, Geo Cauzza, Damian Schmed, Patrizio Decurins
FC Flums 1: Fejzula Aliji, Pascal Kurath, Raphael Zindel, Andreas Nadig, Illnor Osmani, Filip Obradovic, Valon Aliji, Valentino Zollino, Pascal Bösch, Stefan Zeller, Alexandros Pagonas, Fatlind Aliji, Yusuf Türk, Sead Ramadani, Shuajb Abdiu, Florent Ameti, Argjent Sadiki
remarcas: CB Trun/Rabius senza Sandro Orlik, Ramon Orlik, Silvan Muoth, (tuts blessai), Rovin Schmed, Beat Cadruvi (absents)