Per la secund’equipa ha il campiunadi 2023/2024 entschiet a moda perfetga. Ordeifer a Trin gudogna l’equipa cun 1:0.
Nova sesiun, niev cletg. E quei cun in’equipa ch’ei buc da cumparegliar pli cun quella dils davos onns. Bien la mesadad dils giugadurs dalla secund’equipa ein novs. Il cader dumbra actualmein 27 giugadurs, aschia ch’igl ei era buc aschi nausch sche 5-6 giugadurs mauncan pervia digl Open Air Gampel…
Il giug a Trin entscheiva la secunda cun il sistem 4-3-3. Suenter buns giugs da test era plein fidonza. Mo gia suenter bien 90 secundas sa in giugadur dall’equipa da casa cuorer persuls sin gol suenter ina malprecauziun ella defensiun dils hosps. Per fortuna enquera igl attaccader aunc inaga il pass sil collega ch’ei egl offside.
Suenter quella partenza ballucconta surpren il CBTR denton beinspert la bitgetta dil giug. Ina biala acziun ha, denter auter, il Fabrizio Della Valle cun in siet da distanza. Quel vegn paraus dil goli dad Union Trin. Schiglioc ein grondas schanzas da gol plitost raras. Il medem vala era per l’equipa da Trin che vegn buc da crear bia acziuns offensivas las empremas 45 minutas. Ils fans vesan in giug attractiv, denton maunca savens il davos pass per propi far vegnir nervus ils dus golis.
Suenter il te da pausa entscheiva il CB Trun/Rabius cun bia anim e dictescha immediat il giug. Aschia eisi era mo logic che Ursin Candinas (Brischi pign) setta ella 53avla minuta cun in bi siet da distanza ord 20 meters siu emprem gol per la secund’equipa. Suenter quei gol ha l’equipa la megliera fasa dil giug e dominescha igl adversari. Ursin Candinas vegn aunc tier duas bunas occasiuns, mo il secund gol vul buc curdar.
Aschia secapescha ei da sesez ch’il giug vegn enviers la fin pli hectics. Union Trin emprova aunc inaga tut ed operescha cun bia bals liungs. La defensiun plein rutiniers entuorn Fabian Cajacob, Carlo Gautschi e Fabian Collenberg lai denton tier pauc. Ils singuls siets che vegnan sin gol ein negin grond prighel.
Cura che l’ura cuora encunter la 90avla minuta vegn la nervusadad pli e pli gronda sil plaz Prau Davon a Trin, denton specialmein era sil baun da reserva. Flavio Tuor che ha entschiet il giug sco capitani di plein tensiun: «Quei sai buc mirar pli» ed en quei mument setta in giugadur da Trin ord bien 20 meters in siet ch’il goli Gian Carlo Candinas vegn da menar ella latta. Il bal che rebatta setta igl attaccader lu ord 6-7 meters cun in “Vollspann” sur il gol. Cuort suenter ei il giug a fin e la secund’equipa festivescha ina victoria egl emprem giug dalla nova sesiun. Fantastic.
Da menziunar ei en mintga cass era aunc il “debüt” da Simon Decurtins per in’equipa activa dil CB Trun/Rabius. Cun sias acziuns sil plaz ha el gia mussau tgei elegant giugadur ch’el sa esser.
Proxima ga en acziun ei la secund’equipa dil CB Trun/Rabius venderdis, ils 01-09-23 a casa encunter il CB Lumnezia. Quei vegn dil reminent ad esser igl emprem giug da cazzolas a Pustget!
formaziun: Gian Carlo Candinas; Fabian Collenberg, Fabian Cajacob, Carlo Gautschi, Mattias Candinas; Salvatore Stagliano; Moreno Bundi, Fabrizio Della Valle; Ben Deck, Flavio Tuor, Ursin Candinas
reservas: Mauro Galluzzo, Gion Decurtins, Andri Nay, Clau Berther, Elia Sossai, Simon Decurtins