Igl emprem giug da cazzolas insumma a Pustget spiarda la secund’equipa dil CB Trun/Rabius cun 0:2 encunter il CB Lumnezia.
Tgi che dat il ballapei pli versau ei spert stau da veser en quei derbi sursilvan. Il CB Trun/Rabius ha naven dall’entschatta priu enta pugn il giug e schau circular il bal ellas atgnas retschas. Mo tup che quei ei per gronda part capitau ell’atgna mesadad e tochen 30-40 meters avon il gol digl adversari. Memia pauc decisiv e senza muments da surpresa ei il giug dil CB staus. Acziuns da gol ha ei aschia strusch dau per la secund’equipa ell’emprema mesadad. Sulettamein dus siets da distanza dil Dani Monn han procurau per enzatgei sco prighel da gol. Tut auter il CB Lumnezia che ha mess naven dall’entschatta il focus silla defensiva. Cun spertas cunterattaccas e situaziuns da standard han els fatg grev la veta als indigens. Tier l’emprema gronda schanza pils Lumnezian suenter 25 minutas vegn il goli Gian Carlo aunc da sviar il bal cun ina parada sur la latta. Mo paucas secundas pli tard setschenta il bal tuttina aunc ella reit suenter ina gorna directa ed in grond disuorden ella da tschun. Cuntergols suenter gornas directas paran plaunsiu da vegnir in ver politicum tier il CB Trun/Rabius (l’emprem’equipa lai salidar). Cul resultat da 0:1 va ei ella pausa.
Suenter pausa vesan ils fans in maletg semegliont. Il CB Trun/Rabius dictescha vinavon il giug, denton propi prigulus vegn ei darar. Pér suenter bien 75 minutas dat ei finalmein inaga in’acziun nua ch’il bal vegn ella da sedisch dils Lumnezians e promt vegn il Stefano da prender ora in penalti. Dani Monn surpren la responsabladad e setta surora. Ord x motivs lai igl arbiter repeter il penalti, denton puspei vegn il CB buc da nezegiar la caschun. Sch’ei vul buc esser, vul ei buc esser.
Las davosas minutas arvan ils indigens pli e pli fetg ed aschia vegn il CB Lumnezia aunc tier enqual conter malsegir e suenter ina malprecauziun ella defensiun vegn igl attaccader dils hosps da stuschar il bal ella reit tier il 2:0. La decisiun en quei giug da cazzolas a Trun.
Il CB Trun/Rabius ha dau il ballapei cun la nezza pli fina (feinere Klinge), denton han ils Lumnezians en tutta cass meritau quella victoria cun gudignar la gronda part dils cumbats dubels e cun dar il ballapei pli effectiv.
Vinavon vai per la secund’equipa proxim venderdis sera ordeifer encunter la US Rueun.
formaziun: Gian Carlo Candinas, Fabian Collenberg, Fabian Cajacob, Carlo Gautschi, Mattias Candinas; Salvatore Stagliano, Daniel Monn, Moreno Bundi; Ben Deck, Curdin Tuor, Michael Decurtins
reservas: Andri Nay, Andri Carigiet, Ursin Candinas, Kevin Albin, Phillipe Vincenz, Stefano Stagliano, Bono Deplazes