Finalmein 3 puncts

Suenter ch‘il CB Trun/Rabius ha spiars treis giugs en seria, ei il giug dalla 4. runda dil campiunadi da 3. ligia encunter l‘emprema equipa digl FC Landquart staus sil program. Cun Landquart spetga in adversari che ha recaltgau siu emprem punct en la runda d‘atun encunter l‘equipa da Schluein/Glion, aschia ch‘il CBTR sto spitgar in ferm adversari.

Il giug entscheiva fetg ulivs cun bia cumbats el miez dil plaz. Suenter biebein 5 minutas ed ina buna attacca lantschada sur l’ala seniastra seresulta ina corna ch‘il CB Trun/Rabius nezegia gest. Gianin Derungs vegn da marcar cul tgau igl 1:0 pils hosps dalla Cadi. Silsuenter vegn Trun/Rabius per in cuort temps meglier el giug ch’il caucasa ed ha entras in ni l’auter siet da distanza era ulteriuras pusseivladads da marcar il 2:0. Suenter 12 minutas ed ina sperdita dil bal ella zona da miez dat ein ina sperta cunteratacca che sa mo vegnir frenada entras in foul ella zona da puniziun. Il penalti vegn nezegiaus da Flavio Hertner ed ei stat 1:1. Silsuenter spiarda il giug fetg bia qualitad sin omisduas varts, ei dat strusch pli cumbinaziuns sur pliras staziuns, fetg bia malexactadads e sbagls individuals. Suenter biebein 28 minutas ven Remo Alig lantschaus da Mathias Flepp che setta ord cuorta distanza sin gol, il goli vegn da parar il siet, denton mo entochen tier Gianin Derungs che spetga sin 16 meters e marca il 2:1 per Trun/Rabius – quei ei dil reminent il 4. goal el 4. giug per Gianin Derungs. Entochen pausa ha Trun/Rabius, sco era Landquart entginas mesas caschuns che vegnan denton buc nezegiadas, aschia che Trun va cun in avantatg da 2:1 ella pausa.

Era suenter pausa ei la qualitad dil giug buc carschida ed ei dat vinavon fetg bia malexactadats. Ella 47’avla minuta vegn Landquart tier ina fetg buna acziun che sa denton vegnir parada da nies goli Beat Cadruvi a moda suverana. Silsuenter ei il giug vinavon fetg ulivs, denton Trun ha las meglieras caschuns da marcar il 3:1 e lai tier davos paucas caschuns da marcar il 2:2. Landquart arva davos pli e pli fetg e Trun ha in tozzel caschuns da marcar, quellas acziuns vegnan denton buc giugadas bein a fin, sittadas schliet ni ch’il ferm goli da Landquart Leon Minni vegn da parar ils siets. Aschia ch’ei cuozza entochen la 92’avla minuta entochen ch’il CB Trun/Rabius sa puspei giubilar. Il giuven giugadur Tizian Duff ch’ei vegnius midaus en cuort avon la fin retscheiva in bal liung dad Andri Carigiet. El sa mitschar dalla defensiun, cuorer persuls encunter il gol e marcar cun saung freid bass el cantun dretg siu emprem gol per l’emprema equipa dil CB Trun/Rabius.

Aschia che Trun/Rabius sa festivar ses emprems 3 puncts en quella runda d’atun suenter ina prestaziun plitost mediocra. Uss vala ei da prender cun il slontsch da quels 3 puncts ils proxims impurtonts giugs encunter adversaris ch’ein da puder. Denton drova ei segir ina megliera prestaziun che encunter Landquart. Proxima sonda gioga Trun/Rabius ordeifer encunter il FC Lusitanos de Samedan el ¼ final dalla cuppa Grischuna, avon ch’ei va vinavon el campiunadi da 3. ligia a Pustget encunter FC Flums.