Il turnier da premis 2019 ei gia historia – ord nossa vesta ina historia gartegiada. Buca meins che 31 equipas ein uonn separticipadas al turnier da premis; 11 equipas d’affons, 5 ella categoria victoria e 15 ella categoria plausch. Da bialaura e temperaturas fetg emperneivlas han las giugadurs ed ils giugadurs astgau guder in turnier che ha purschiu per grond e pign il necessari. Da magliar e da beiber ha ei dau dètgavunda; cun «fun-parc» e las «1000 schongladas» ei ultra da quei vegniu procurau per cuort’uriala era sper il menaschi da giug.
Ils victurs dallas categorias ein stai ils suandonts: Tier ils affons 1 (4.-6 classa) han «Ils Sursilvans» gudignau il final encunter «Las Legendas» en penaltis; la categoria dils affons 2 (3. classa e pli giuven) ha il «Team Schponschboss» gudignau. Tier ils carschi ei l’equipa cul num «37» semessa atras encunter ses adversaris ella categoria victoria, ferton ch’ils giuvens cul num «The Invincibles» han fatg tutta honur a lur num e gudignau tut ils giugs includiu il final dalla categoria plausch. Ils buccals retscharts uonn ein vegni fabricai da Fabian Cajacob e Ramon Orlik – in grond cumpliment per lur oreifra lavur! Plein luschezia han las equipas astgau alzar quel ad ault; accumpignai ein els leutier vegni dalla canzun «We are the Champions!» – cura che la colligiaziun d’internet ha finalmein inaga funcziunau 😉
Sco premis han ils affons e giuvenils uonn retschiert in glatsch preparau dil Stefano; pils carschi ha ei dau ina buna butteglia vin cun etichetta speciala. Quella astgan las equipas allura guder da cuminonza suenter lur prestaziun al turnier dad oz.
Per finir lein nus buca munchentar d’engraziar a tuttas persunas ch’ein segidadas sin ina moda ni l’autra d’organisar il turnier da premis 2019, sco era a nos numerus sponsurs per lur contribuziuns. Nus astgein pia mirar anavos sin in bi turnier da premis 2019 e selegrein gia sil proxim turnier da quei gener. En quei senn engraziein medemamein era a tuttas equipas ch’ein separticipadas a nies turnier da plausch. Igl ei stau in bi di! Cheu sut anfleis vus entginas impressiuns dil di dad oz.
fotografias da Sandro Tomaschett
