trun/rabius schocchescha il capogruppa

Il CB Trun/Rabius para actual dad esser en fuorma e gudogna in tec surprendent denton fadegiau a Bogn Ragaz encunter il capogruppa. Mo l’entschatta dalla partida gartegia insumma buc all’equipa dalla Cadi. Gia suenter treis minutas va Bogn Ragaz entras Orlando Caluori en avantatg. Nauschas regurdientschas vid la terrada ad Eschenbach avon duas jamnas vegnan tgunsch gia si tier enqualin. Mo na na, cheu ei tut in’autra equipa sil plaz che aunc avon duas jamnas. Trun/Rabius anfla meglier e meglier ella partida e vegn da remisar entras Gianin Derungs suenter in culp liber ed ina truscha avon gol. Quater minutas pli tard setta Livio Janka in da ses renomai culps libers sco in streh el cantun liung ed aulza il resultat sin 1:2. Il giug ei vulvius e Bogn Ragaz ei perplex.

Suenter pausa vegn l’equipa da casa denton pli ferma ô da cabina e vegn aschia entras Anian Roffler tier lur secund gol. Mo Trun/Rabius lai buc irritar da quei ed anfla puspei anavos ella partida. Ella 70. minuta vegn ei schizun aunc meglier per il CBTR. Suenter ina corna ei Gianin Derungs postaus leu nua ch’in attaccader cun saung freid ha dad esser e setta ils hosps en avantatg. Dil reminent ei quei il 6avel gol da Gianin ellas davosas treis partidas. Sco ins ei endisai da Bogn Ragaz emprovan els uss cun tut ils trics – schizun l’ura vegn tenida eri tier 88:39 (!) – da remisar, mo Trun/Rabius sedefenda cun tut lur pusseivladads e procura aschia per l’emprema sperdita dalla sesiun per Bogn Ragaz.

Continue Reading

bènaltè! 2021

Punctualmein sill'entschatta dalla nova sesiun da ballapei astgein nus tener enta maun – ni sil admirar en fuorma digitala sin tablets, computers, smartphones etc. – la sisavla ediziun dil «bènaltè!». Questa ediziun sefatschenta oravontut culla collaboraziun dils dus anteriurs rivals – il CB Trun/Rabius e l'US Danis-Tavanasa – e siu futur. 

Secapescha vegnan era nos juniors buca alla cuorta. Igl ei adina stau ina finamira da nossa redacziun d’era porscher als juniors, nies futur, spazi ed ina plattafuorma. Sco usitau vegn era il humor buc alla cuorta. Cun ina rubrica cun leghers maletgs vulein nus contonscher ils lecturs e las lecturas che legian meins bugen e prefereschan comics.

Malgrad che la sesiun 2020/2021 ei stada speciala, eisi era vegniu dau ballapei a Trun. Sil scalem da juniors ha la sesiun saviu vegnir menada atras pli u meins normal. Entginas equipas han era saviu festivar grond success. Per exempel han nos juniors C fatg il pass naven dalla 2. ella 1. classa da fermezia. Quella equipa vegn prida sut la marella in tec pli en detagl. 

Nus sperein da saver svegliar vies interess, giavischein a vus bien divertiment culla lectura e selegrein da bunas discussiuns davart il CB Trun/Rabius. Manteni il humor e stei sauns!

Il «bènaltè!» 2021 en fuorma da PDF saveis vus telecargar cheu.